Cathetrau mewnwythiennol perifferol hyd hir

Crynodeb mewn iaith glir

Mae therapi mewnwythiennol (IV) yn ddull o roi meddyginiaeth, hylifau a maetholion yn uniongyrchol yn llif gwaed person. Mae’r dull hwn yn cynnwys gosod tiwb plastig mewn gwythiennau gan ddefnyddio nodwydd i dyllu’r croen a helpu i arwain y tiwb. Gall y tiwb gael ei alw’n “gathetr”, “llinell” neu “ganwla”. Caiff y nodwydd ei thynnu unwaith y bydd y tiwb yn ei le. Mae pen arall y tiwb wedi’i gysylltu i fag mawr sy’n cynnwys y feddyginiaeth, yr hylifau a/neu’r maetholion. IV ymylol yw’r mathau sy’n cael eu rhoi mewn gwythiennau ar ran isaf y fraich neu ar gefn y llaw.

Gall gosod cathetr IV fod yn brofiad poenus. I rai pobl, gall fod yn anoddach dod o hyd i wythïen addas neu osod y tiwb yn ei le. Gelwir hyn yn “fynediad IV anodd”. Gall fod yn anoddach gosod cathetr IV ar gyfer pobl sydd â nodweddion penodol, er enghraifft gwythiennau bregus. Gall hyn arwain at nife ro ymgeisiau i fewnosod IV gan wahanol weithwyr gofal iechyd proffesiynol.

Cathetrau IV hir yw IV lle mae’r tiwb yn hirach nag arfer. Cynigir yr hyd ychwanegol i helpu i wneud mewnosod yn haws a gallai olygu y gall yr IV aros yn ei le am gyfnod hirach nag arfer. Byddai hyn yn golygu y dylai cleifion sydd â mynediad IV anodd orfod profi llai o ymdrechion i gael llinell IV wedi’i gosod a byddai angen ei newid am un newydd yn llai aml.

Chwiliodd Technoleg Iechyd Cymru am dystiolaeth ar gyfer cathetrau mewnwythiennol ymylol hir ar gyfer cleifion sydd â mynediad IV anodd. Dylai cathetrau mewnwythiennol ymylol hir (LPCs) fod ar gael fel mater o drefn fel dewis arall yn lle cathetrau mewnwythiennol ymylol byr (SPCs) ar gyfer pobl sydd â mynediad mewnwythiennol anodd y disgwylir i’w hangen am fynediad mewnwythiennol bara rhwng pedwar a 14 diwrnod.