Dyfeisiau brachytherapi mewnblannu parhaol ar gyfer canser pancreatig na ellir ei lawdrin
Statws Testun Cyflawn
Dyfeisiau brachytherapi mewnblannu parhaol i drin canser pancreatig lleol na ellir cael gwared arno'n llwyr drwy lawdriniaeth
Arbenigeddau: Canser
Canlyniad yr arfarniad
Nid yw’r dystiolaeth yn cefnogi’r defnydd o ddyfeisiau bracitherapi mewnblaniad parhaol ar gyfer canser y pancreas na ellir ei echdorri yn ychwanegol at driniaeth gonfensiynol.
Nid yw hap-dreialon rheoledig wedi nodi unrhyw welliant mewn canlyniadau clinigol o bwys, megis goroesiad heb waethygu a goroesiad cyffredinol, o gymharu â chemoradiotherapi yn unig.
Mae diffyg buddion clinigol ystadegol arwyddocaol yn atal dadansoddiad cost-effeithiolrwydd o ddyfeisiau bracitherapi mewnblaniad parhaol o’u cymharu â thriniaeth glinigol berthnasol.
Mae triniaeth gyda bracitherapi yn dechnegol heriol, ac mae risg o ddigwyddiadau andwyol. Felly, nid yw’r dystiolaeth yn cefnogi ei defnyddio ar hyn o bryd.
Pam y cafodd y pwnc hwn ei arfarnu?
Canser y pancreas yw’r deuddegfed canser mwyaf cyffredin yng Nghymru, ond y chweched prif achos marwolaeth o ganlyniad i ganser. Nid yw’r symptomau’n benodol yn y cyfnod cynnar, sy’n golygu ei fod fel arfer yn cael ei ddiagnosio pan fydd wedi datblygu’n lleol neu’n fetastatig. Ar y cam hwn mae’r canser yn aml yn un na ellir ei echdorri, gyda thriniaeth yn canolbwyntio ar arafu effeithiau a lledaeniad y canser.
Math o radiotherapi mewnol yw bracitherapi sy’n golygu gosod deunydd ymbelydrol yn uniongyrchol yn y tiwmor i ddarparu dos o ymbelydredd lleol. Mae gan ychwanegu bracitherapi at driniaeth safonol ar gyfer canser y pancreas na ellir ei echdorri y potensial i wella rheolaeth leol ar y tiwmor, a allai yn ei dro arwain at well goroesiad cyffredinol heb waethygu.
Awgrymwyd y pwnc hwn i HTW gan OncoSil Medical Ltd, cynhyrchydd OncoSil.
Crynodeb mewn iaith glir
Organ yw’r pancreas sydd wedi’i lleoli y tu ôl i ran isaf y stumog. Mae ganddi ddwy swyddogaeth: cynhyrchu ensymau sy’n helpu i dreulio bwyd a gwneud inswlin, sy’n helpu i reoli lefelau siwgr yn y gwaed. Mae canser y pancreas yn fath o ganser sy’n dechrau fel twf celloedd yn y pancreas.
Gall fod yn anodd gweld symptomau canser y pancreas. Gall y rhain gynnwys clefyd melyn, salwch, colli pwysau, diffyg traul a phoen bol. Gall cynlluniau triniaeth ar gyfer canser y pancreas gynnwys llawdriniaeth, cemotherapi a radiotherapi.
Math o therapi ymbelydredd yw bracitherapi lle gosodir ffynhonnell o ymbelydredd wedi’i selio y tu mewn neu wrth ymyl ardal y driniaeth. Mae bracitherapi mewnblaniad parhaol yn defnyddio mewnblaniadau pelydrol a elwir yn belenni neu hadau. Mae’r mewnblaniadau hyn yn fach iawn, tua maint gronyn o reis. Rhoddir yr hadau’n uniongyrchol i mewn i diwmor gyda nodwyddau tenau, gwag. Yna mae’r ymbelydredd yn yr hadau yn trin y canser. Mae’r hadau’n cael eu gadael yn eu lle ar ôl i’r ymbelydredd gael ei ddefnyddio.
Chwiliodd Technoleg Iechyd Cymru am dystiolaeth ynghylch bracitherapi mewnblaniad parhaol ar gyfer canser y pancreas na ellir ei echdorri. Nid yw’r dystiolaeth yn cefnogi’r defnydd o ddyfeisiau bracitherapi mewnblaniad parhaol ar gyfer canser y pancreas na ellir ei echdorri yn ychwanegol at driniaeth gonfensiynol.
Canllaw
GUI063 01.2025
Adroddiad Gwerthuso Tystiolaeth
EAR063 01.2025
Adroddiad Archwilio Pwnc
TER503 11.2023 (wedi cael ei ddisodli gan EAR063 01.2025)
Partneriaid Technoleg Iechyd Cymru
