Profion genynnau MAF i arwain triniaeth bisffosffonad ategol mewn canser y fron
Statws Testun Cyflawn
Profion genynnau MAF i arwain triniaeth bisffosffonad ategol mewn canser y fron
Canlyniad yr arfarniad
Nid oes digon o dystiolaeth i gefnogi mabwysiadu profion genynnau MAF fel mater o drefn i arwain triniaeth bisffosffonad ategol mewn canser y fron cynnar.
Astudiwyd effeithiolrwydd clinigol profion genynnau MAF mewn dadansoddiadau is-grŵp ôl-weithredol o ddau dreial rheoledig ar hap. Cynlluniwyd y treialon hyn i werthuso effeithiolrwydd bisffosffonadau, ond ni wnaethant werthuso defnydd rhagolygol profion genynnau MAF i arwain triniaeth. Mae’r diffyg tystiolaeth sy’n cymharu profion genynnau MAF yn rhagolygol â statws neu oedran y menopos fel dulliau haenu cleifion yn golygu bod effeithiolrwydd defnyddio’r prawf i arwain triniaeth yn ansicr.
Amcangyfrifodd modelu economaidd y gallai defnyddio profion genynnau MAF i arwain triniaeth bisffosffonad ategol fod yn gost-effeithiol o’i gymharu â gofal arferol. Fodd bynnag, mae’r ansicrwydd yn y dystiolaeth effeithiolrwydd clinigol hefyd yn berthnasol i’r modelu economaidd.
Argymhellir ymchwil pellach i werthuso’r defnydd o brofion genynnau MAF i arwain defnydd bisffosffonad mewn astudiaethau rhagolygol ac ymarfer clinigol yn y byd go iawn.
Pam y cafodd y pwnc hwn ei arfarnu?
Grŵp o gyffuriau y dangoswyd eu bod yn lleihau ail-ddigwyddiad a marwolaethau mewn pobl â chanser y fron yw bisffosffonadau, ond mae’r effeithiau’n gyfyngedig i’r rheini sy’n ôl-menopos. Gellir cynnig bisffosffonadau (asid zoledronig neu sodiwm clodronad) fel therapi ategol i’r rheini sy’n ôl-menopos sydd â chanser y fron ymledol nod-positif a’u hystyried ar gyfer y rhai â chanser y fron ymledol nod-negatif sydd a risg uchel o ail-ddigwyddiad.
Fel arfer, mae’r menopos yn digwydd dros flynyddoedd a gall ei ddiffinio fod yn gymhleth ac yn amwys. O ystyried hyn, mae canllawiau proffesiynol wedi tynnu sylw at ddefnydd posibl biofarcwyr fel dewis arall yn lle triniaeth bisffosffonad uniongyrchol i’r rhai a allai elwa fwyaf ganddi. Awgrymwyd y genyn MAF fel un biofarciwr o’r fath. Mae’r MAFTEST (InBiomotion, Barcelona, Sbaen) yn offeryn dosbarth IIa i ganfod ymhelaethiad genyn MAF. Cynigir y gellir defnyddio statws ymhelaethiad genyn MAF, fel y’i aseswyd gan y MAFTEST, fel offeryn haenu cleifion (yn hytrach na statws menopos) i gyfeirio bisffosffonad ategol mewn canser y fron cynnar.
Cynigiwyd y pwnc i Dechnoleg Iechyd Cymru (HTW) gan y gwneuthurwr, InBiomotion.
Crynodeb mewn iaith glir
Beth yw canser y fron?
Mae canser yn glefyd lle mae rhai o gelloedd y corff yn newid ac yn tyfu’n ddi-reolaeth. Mae canser y fron yn ganser sy’n dechrau ym meinwe’r fron. Mae tiwmorau’n ffurfio o’r celloedd ychwanegol sy’n cael eu tyfu. Os na chânt eu gwirio, gall y tiwmorau hyn ledaenu i rannau eraill o’r corff. Canser y fron cam cynnar yw canser sydd wedi’i leoli ym meinwe’r fron yn unig ac nad yw wedi lledaenu i rywle arall eto.
Beth yw triniaeth bisffosffonad?
Fel arfer, llawdriniaeth i gael gwared ar y tiwmor yw triniaeth ar gyfer canser y fron cam cynnar. Ar ôl llawdriniaeth, gall clinigwr ragnodi meddyginiaeth o’r enw bisffosffonadau. Rhoddir y feddyginiaeth i amddiffyn esgyrn rhag teneuo oherwydd y driniaeth canser y fron. Fel arfer, mae hyn yn bryder i gleifion sydd wedi mynd trwy’r menopos. Defnyddir bisffosffonadau hefyd i atal y canser rhag dychwelyd. Gelwir hyn yn driniaeth ‘ategol’. Fodd bynnag, gall bisffosffonadau gael sgil-effeithiau i rai cleifion. Mae’r rhain yn cynnwys salwch ysgafn, diffyg traul, symptomau tebyg i’r ffliw ac ar adegau, dirywiad yr esgyrn yn yr ên, a elwir yn osteonecrosis yr ên. Gall yr sgîl-effeithiau hyn gael goblygiadau difrifol i rai cleifion.
Fel arfer, penderfynir a ddylid rhagnodi bisffosffonadau i glaf trwy ystyried statws menopos y claf. Fodd bynnag, nid yw hyn yn rhoi arwydd clir a all y bisffosffonadau arwain at sgil-effeithiau i’r claf hwnnw.
Beth yw’r prawf genyn MAF?
Mae presenoldeb y genyn MAF yn gysylltiedig â’r cleifion hynny sy’n profi dirywiad esgyrn ar ôl triniaeth bisffosffonad. Gall prawf i weld a oes gan glaf y genyn MAF fod yn ffordd o benderfynu a ydynt yn glaf priodol ar gyfer triniaeth bisffosffonad.
Beth wnaeth Technoleg Iechyd Cymru?
Chwiliodd Technoleg Iechyd Cymru am dystiolaeth ar ddefnyddio profion genyn MAF i arwain triniaeth bisffosffonad ategol mewn canser y fron cynnar. Nid oes digon o dystiolaeth i gefnogi mabwysiadu profion genyn MAF fel mater o drefn i arwain triniaeth bisffosffonad ategol mewn canser y fron cynnar.
Canllaw
GUI072 10.2025
Adroddiad Gwerthuso Tystiolaeth
EAR072 10.2025
Adroddiad Archwilio Pwnc
TR576 02.2025 (superseded by EAR072 10.2025)
Partneriaid Technoleg Iechyd Cymru
