Ymyriadau drwy adborth fideo

Crynodeb mewn iaith glir

Mae camdriniaeth plant yn cael effaith negyddol ar les plant a gall gael effeithiau hirdymor ar ddatblygiad cymdeithasol, emosiynol a meddyliol y plentyn. Gall ffyrdd effeithiol o wella’r berthynas rhwng y sawl sy’n rhoi gofal a’r plentyn o bosibl wella sgiliau rhianta, straen rhieni a’r amgylchedd teuluol a all gael effeithiau pwysig ar blant. I blant sydd mewn cysylltiad â gwasanaethau plant ac a allai fod mewn perygl o niwed, mae hyn yn arbennig o bwysig er mwyn ceisio atal niwed pellach rhag digwydd ac, yn y sefyllfaoedd gwaethaf, plentyn yn gorfod gadael ei deulu.

Term eang yw ymyriadau adborth fideo sy’n cynnwys llawer o wahanol ymyriadau, er eu bod i gyd yn defnyddio adborth fideo wedi’i recordio. Gelwir un o’r ymyriadau yn canllawiau rhyngweithio fideo (VIG) sydd wedi’i ddefnyddio ar draws ystod eang o wahanol leoliadau i wella cyfathrebu ac ymlyniad rhwng unigolion, yn enwedig y sawl sy’n rhoi gofal a’u plant. Gellir cynnal VIG dros sawl sesiwn a gan ystod o weithwyr proffesiynol, ond mae gan ymyriad o’r fath ddull cyffredin. Yn ystod sesiynau, bydd gweithiwr gofal cymdeithasol proffesiynol yn helpu’r sawl sy’n rhoi gofal i osod amcanion, nodau a disgwyliadau VIG. Yna mae’r gweithiwr proffesiynol yn cofnodi sgyrsiau a gweithgareddau rhwng y rhai sy’n rhoi gofal a’u plentyn a dangosir y rhain i’r rhai sy’n rhoi’r gofal a’u plant, os ydynt yn ddigon hen, gan ganolbwyntio ar adegau cadarnhaol. Gall hyn helpu’r sawl sy’n rhoi gofal i fyfyrio ar ei berthynas/pherthynas a gwneud cynnydd tuag at ei nodau.

Edrychodd Technoleg Iechyd Cymru am dystiolaeth o effeithiolrwydd ymyriadau adborth fideo i wella canlyniadau i blant a’u teuluoedd sydd mewn perygl o ddioddef neu niwed sylweddol neu gamdriniaeth.