> Yr adroddiad archwiliad mabwysiadu diweddaraf yn datgelu effaith canllawiau HTW yng Nghymru
Newyddion

19 Ionawr, 2026

< CEFN

Yr adroddiad archwiliad mabwysiadu diweddaraf yn datgelu effaith canllawiau HTW yng Nghymru

 

Mae’n bleser gennym gyhoeddi bod ein Hadroddiad Archwiliad Mabwysiadu 2024/25 wedi cael ei gyhoeddi.

Canolbwyntiodd archwiliad eleni ar 11 canllaw HTW a thri chanllaw Gwerthuso Technolegau Meddygol (MTEP) NICE.

Cyrhaeddodd yr archwiliad y gyfradd ymateb orau hyd yma, sef 98%, gyda chyfranogiad gan bob un o’r 10 sefydliad comisiynu yng Nghymru.

 

Mae canfyddiadau allweddol yr archwiliad mabwysiadu yn cynnwys y canlynol:

  • Adroddwyd bod eglurder y canllawiau yn dda mewn bron pob achos (96%)
  • Adroddwyd bod canllawiau wedi cael rhyw fath o effaith ar wneud penderfyniadau yn y rhan fwyaf o achosion (59%)
  • Mae ymatebion gan sefydliadau lle’r oedd y canllawiau’n berthnasol yn dangos gostyngiad mewn ymwybyddiaeth gyffredinol o’r canllawiau o’i gymharu ag archwiliadau blaenorol, gyda 60% o sefydliadau’n cadarnhau bod sefydliadau’n ymwybodol o’r canllawiau.
  • Roedd y bwriadau i ddilyn argymhellion canllawiau yn amrywiol ar gyfer pob darn o ganllaw HTW a aseswyd, gyda’r gydymffurfiaeth fwyaf ar gyfer canllawiau HTW ar brostheteg aml-afael ar gyfer y breichiau, a’r lleiaf ar gyfer canllaw HTW ar fewnblannu synwyryddion pwysedd rhydwelïau ysgyfeiniol trwy’r croen.
  • Dilynwyd canllawiau NICE gan bron bob Bwrdd Iechyd, ac fe gafodd y rhan fwyaf o ganllawiau NICE rywfaint o effaith ar wneud penderfyniadau.

 

Ar y cyfan, roedd lefelau ymwybyddiaeth ac effaith y canllawiau yn gyson ag archwiliadau blaenorol ymhlith sefydliadau sy’n comisiynu ac yn darparu technoleg, ond roeddent yn sylweddol is ymhlith sefydliadau sy’n gomisiynwyr yn unig. Mae’n bosibl bod newidiadau a gyflwynwyd eleni i’r eglurhad o’r hyn y dylid ei ystyried yn ganllawiau perthnasol wedi cyfrannu at y canfyddiadau hyn.

 

Er bod cyfran uchel o sefydliadau wedi nodi bod argymhellion y canllawiau yn glir, rhoddodd rhai ymatebwyr sylwadau a awgrymodd fod ansicrwydd ynghylch sut mae sefydliadau’n penderfynu pa ganllawiau sy’n berthnasol iddynt, beth y disgwylir iddynt ei wneud mewn ymateb i ganllawiau, a phwy sy’n gyfrifol am weithredu’r canllawiau.

 

Yn y dyfodol, bydd HTW a sefydliadau comisiynu yn parhau i adolygu eu prosesau ar gyfer lledaenu canllawiau, er mwyn sicrhau ymwybyddiaeth orau o ganllawiau. Yn y cyfamser, bydd HTW,

WNHN (Welsh NICE Health Network) a Llywodraeth Cymru yn ailadrodd ac yn egluro statws canllawiau HTW a NICE yng Nghymru, gan gynnwys disgwyliadau gan sefydliadau comisiynu mewn ymateb i’r canllawiau hyn.

 

Dywedodd Susan Myles, Cyfarwyddwr Technoleg Iechyd Cymru:

 

“Mae ein hadroddiad mabwysiadu diweddaraf yn rhoi cipolwg gwerthfawr ar effaith ein canllawiau ar draws Cymru.

Rydym wedi ymrwymo i wneud gwelliannau parhaus i’n prosesau archwilio mabwysiadu, ac yn parhau i weithio’n agos gyda’n rhanddeiliaid ar draws Cymru i godi lefelau ymwybyddiaeth o’n canllawiau.

Hoffem achub ar y cyfle hwn i ddiolch i’n partneriaid am eu cefnogaeth barhaus i’n gwaith, a’u cyfraniadau gwerthfawr i’r archwiliad mabwysiadu.”

 

I ddarganfod mwy a darllen adroddiad Archwiliad Mabwysiadu HTW 2024/25 yn llawn, cliciwch yma.